२९ वैशाख २०७८, बुधबार। कर्णाली प्रदेशका मुख्यमन्त्री महेन्द्रबहादुर शाहीले कोरोना भाइरसको महामारीको बेला मन्त्रालय फुटाएर मन्त्री नियुक्त गरेका छन् । सात वटा प्रदेश सरकारहरुमध्ये कार्यसम्पादन सबैभन्दा कमजोर भएका मुख्यमन्त्री शाहीले सांसदको चित्त बुझाउन मन्त्रालय नै फुटाएर मन्त्री नियुक्त गरेका हुन ।
शाहीले भौतिक पूर्वाधार विकास मन्त्रालय फुटाएर सिंचाई, खानेपानी र जलस्रोत मन्त्रालय बनाएका छन् । यससंगै कर्णाली प्रदेशमा मन्त्रालयको संख्या आठ वटा पुगेको छ ।
कर्णाली प्रदेशमा माओवादीभित्रै मन्त्री बन्ने आकांक्षीहरु धेरै भएपछि शाही अफ्ठेरोमा परेका हुन । माओवादी केन्द्रका स्थायी समिति सदस्यहरु शक्तिबहादुर बस्नेत र जनार्दन शर्मा दुवैको दबावमा मुख्यमन्त्री शाही छन्। उनले बुधवार गरेको मन्त्रीमण्डल विस्तारमा समेत बस्नेत र शाही निकट एक एक सांसदलाई मन्त्री बनाएका छन् । यद्यपी मन्त्री नियुक्त दुवै जना माओवादीभित्र प्रदेशसभामा सिनियर सांसद हुन ।
शाहीले आर्थिक मामिला तथा योजना मन्त्रीमा नेता जर्नादन शर्माका भाई गोपाल शर्मा र आन्तरिक मामिला तथा कानून मन्त्रीमा नेता वस्नेत गृहमन्त्री हुंदा उनका स्वकिय सचिव समेत रहेका सांसद विन्दमान विष्ट र खानेपानी, सिंचाई र जलस्रोत मन्त्रीमा सिता नेपालीलाई नियुक्त गरेका छन् । नेपाली यसअघि समानुपातिकबाट संघिय सांसदमा सदस्य समेत बनेकी थिईन । नेपाली पनि शर्मा निकट नै हुन ।
यसअघि आन्तरिक मामिलामन्त्री रहेका नरेश भण्डारी हालका गृहमन्त्री रामबहादुर थापाको कोटाबाट मन्त्री बनेका थिए । थापा एमालेमा प्रवेश गरेपछि भण्डारी भने माओवादी केन्द्रमै रहेका थिए । उनी यसअघि मुख्यमन्त्रीका दावेदार समेत थिए । भण्डारी पछिल्लो समय नेता बस्नेतसंग निकट रहेको स्रोतको दावी छ । राजीनामा दिने अर्की मन्त्री विमला केसी पनि शर्माकै आफन्त हुन ।
जम्मा ४० सिट रहेको कर्णाली प्रदेशमा आठ वटा मन्त्री बनाइएको छ । संविधान अनुसार बढीमा २० प्रतिशत मन्त्री बनाउन पाउने प्रावधानमा टेक्दै मुख्यमन्त्री शाहीले बुधबार मन्त्रालय फुटाएर मन्त्री नियुक्त गरेका हुन ।
‘भण्डारी र केसीले मन्त्री त्याग गर्न सुरुमा मानेका थिएनन, त्यसमा पनि त्यत्तिकै सांसद मन्त्रीका आकांक्षी थिए । त्यसैले मन्त्रालय फुटाएर पनि उहांले असन्तुष्टि थामथुम पार्नुभएको हो ।’ मुख्यमन्त्री निकट स्रोतले काठमाण्डुपाटीसंग भन्यो ।
मन्त्री बनाउने आश्वासन पाएर माओवादी केन्द्रमा फर्केका सुर्खेत पुर्वबाट निर्वाचित सांसद ठम्मर विष्टलाई मन्त्री नबनाएपछि उनी असन्तुष्ट बनेका छन् । कर्णाली प्रदेशमा माधव समुहबाट भौतिक पूर्वाधार विकास मन्त्रालयमा अम्मरबहादुर थापा, भूमि व्यवस्था, कृषि तथा सहकारी मन्त्रालयमा कुर्मराज शाही र उद्योग, पर्यटन वन तथा वातावरण मन्त्रालयमा नन्दसिंह बुढा मन्त्री छन् । कांग्रेसले सामाजिक मन्त्रालय पाएको छ । तर, उसले मुख्यमन्त्री शाहीसंग दुई वटा मन्त्रालय मागेको बताइन्छ ।